السلام عليكم و رحمة الله و بركاته
الموضوع و بالمختصر المفيد
- عاوزين نعمل دعاية لـ جنو/لينوكس و المصادر المفتوحة/الحرة في الجامعات و المعاهد و حتى المدارس - غالبا هتكون مدارس ثانوي لغات او خاصة -
- الفكرة الاساسية ,, بدل ما نخلي الناس تيجي لينا احنا هنروح للناس , و زي ما انتوا عارفين العمر ده هيكون كويس جدا يبدأ ياخد فكرة عن البرمجيات الحرة و يقدر يجربها
- انا كنت واحد من اللي حضروا مهرجان جنو/لينوكس الاخير , و كان بوجه عام جميل جدا ما شاء الله
يعني الناس هنا في اللج لهم خبرة كبيرة في تنظيم الحاجات دي :)
- عن نفسي تصوري للموضوع ,, هيكون عبارة عن ندوة في كل كلية في جماعة معينة - كل مجموعة في جامعة ينظموا الموضوع ده -
- الندوة دي هتكون عبارة عن نسخة مصغرة من مهرجان جنو/لينوكس
هنعرف الناس على البرمجيات المفتوحة/الحرة و اللينوكس و نعرض النظام و نوضح اهم المميزات و ايه المشاكل اللي ممكن يواجهوها و الكلام ده كله
- بالنسبة للموارد البشرية , انا و حوالي 2 كمان ان شاء الله اساسي هنشارك - احنا في جامعة القاهرة - , و اعرف حوالي 4 كمان من عين شمس ممكن يشاركوا - و هقدر اجيبهم القاهرة او نرح احنا عين شمس مفيش مشاكل -
- بالنسبة للموارد المادية ,, يعني الفلوس و الاجهزة
دي بقى انتوا اللي هتقولولي عليها الموضوع ممكن يتكلف كام و هنحتاج جهزة زي ايه ؟ - بروجيكتور و حاجات للصوت و ايه تاني ؟ -
- و برده ايه نظام الشركات الراعية في الموضوع ده ؟
و لو حد عنده خلفية عن موضوع الندوات في الجامعة برده هتكون معلومات مفيدة :)
مستني الاراء و الاقتراحات :)
هو ده الكلام
.
.
ايوه هو ده الكلام ولا بلاش
عجبتنى اوى جمله "بدل ما نخلي الناس تيجي لينا احنا هنروح للناس"
انا شايف ان ده صح جدا وياسلام لو يكون فى بدايه السنه الدراسيه
يعنى لما الناس تعرف عن الجنو/لينوكس عن طريق النت ولا لما تعرف عنه
مثلا من اعلان فى الجامعه , الشباب فى الجامعه عندها حب استطلاع هتلاقى
اقبال وناس عاوزه تعرف يعنى ايه لينوكس وليه احنا بنستعمله وبنفضله عن اللينوكس على العموم انا معاك فى الفكره ومعاك فى التنفيذ كمان وهتابع الموضوع كل يوم
وفى الختام سلام ,,,
The quieter you become, the more you are able to hear
الله ينور
والله هو كلامك حلو او واحنا كنا عاملين Install Fest في الGUC بس الموضوع مكبرش لدرجة انة ياخد جامعة القاهرة وعين شمس.
انا هنا في الاسكندرية وياريت لو نعمل حاجة زي كده بس المهم اسئل الاول في الكلية هل يرضوا يدوني الفرصة اني اعلق ورق عن اللينكس ولا لا.
لكن لازم نعرف هل نعمل الكلام ده دلوقتي ولا في رمضان ولابعد كده لاننا لازم نحط في اعتبرنا الناس حتكون موجوده امتي.
بس انا كمان معاكم :)
جميل جدا ^_^
deltaman & mogaio
ده كلام جميل جدا ,, بس المشكلة الاساسية اننا مش بنكون من نفس المحافظة
اقصد يعني ان كل منطقة او مدينة هتكون مجموعة و تعمل الموضوع ده ,,
deltaman , انت منين ؟ و ايه الاماكن اللي تقدر توصلها مثلا ؟
mogaio , حاول تظبط مع مجموعة مستخدمي جنو/لينوكس اللي في الاسكندرية و تعملوا الموضوع ده
عن نفسي انا في جامعة القاهرة , و اقدر اروح عين شمس , و اي جامعة في 6 اكتوبر او القاهرة عموما يعني
و كدا كدا هيكون يوم واحد كل فترة فمش هتفرق كتير :)
و مستنيين بقية الناس , بالذات اللي شاركوا في حاجات زي دي قبل كدا :)
كده يبقى تمام
.
.
اعتقد ان معظمنا من القاهره وبقيتنا فى الاسكندريه
وده ميمنعش ان فى ناس مهتمه بالموضوع فى باقى المحافظات
بس احنا نبدا الاول ونشوف ايه النتيجه
Skeleton_Eel , انا فى عين شمس وممكن اجى القاهره او حلوان
يعنى اوك انا معاكم بس طبعا عاوزين حد من الناس اللى نظمت حاجه
زى كده قبل كده وبالذات الناس اللى نظمت فى الــ GUC
The quieter you become, the more you are able to hear
deltaman ممتاز جدا
deltaman ممتاز جدا ,, ^_^
و فين بقية الناس اللي هنا :(
بجد الموضوع ممكن يقف اذا مكناش عارفن هنعمل ايه بالظبط :(
IEEE Alex SB
انا أحمد سعيد، طالب هندسة الاتصالات و الاكترونيات بجامعة الاسكندرية و أعمل كمتطوع بفرع IEEE بنفس الجامعة.
يمكن ناس كتير ماتعرفش ان جامعة الاسكندرية بدأت تتجه مؤخرا نحو اللينوكس و ده ظهر لما حولوا سرفرات الجامعة من مايكروسوفت للينوكس و كمان طلبة قسم كمبيوتر دلوقتى أصبحوا بيدرسوا Java فى سنة أولى (قبل .net و أى حاجة تانية)
و ده دفعنا فى IEEE اننا ننظم محاضرة تعريفية عن ال linux و الunix فى المؤتمر(www.alexsb.org/itw) اللى نظمناه الشهر اللي فات فى مكتبة الأسكندرية.
و الحمدلله معظم الحاضرين كان عندهم positive feedback و استثمارا للنجاح ده احنا يفكر نعمل workshop أو crash course فى نفس الموضوع.
فمبدئيا احنا متحمسين للفكرة بس غالبا هنحتاج speakers...
_ our website:
NetCraft results for Alexandria Univ website:
NetCraft results for Alexandria Faculty of Engineering website:
معاك
بصراحة دي أول مرة أتكلم فيها مع مستخدمي لينكس في مصر.. أنا بستخدم لينكس أكتر من سنتين دلوقتي, طالب في هندسة القاهرة بس كهربة مش كمبيوتر.. و أحب أساعد. هوا الموضوع وصل لحد فين دلوقتي؟
مفيش فايده
. .
السلام عليكم ورحمه الله وبركاته طبعا نورتنا فى الموضوع ونتمنى تكون معانا بس زى ما انت شايف الموضوع كعاده المواضيع واقف فى بعض الناس بتقول عشان رمضان والمدارس وكده بس لو فى نيه اصلا كان يبقى على الاقل فى تفاعل بين الاعضاء على العموم ادينا مستنين زى ما قلت الناس اللى ليهم خبره فى تنظيم حاجه زى كده :(
======================================
The quieter you become, the more you are able to hear
ممكن نبدأ قريب في الفيوم
السلام عليكم ورحمة الله وبركاته أولا, كل سنة وانتو طيبين. أنا في كلية الهندسة جامعة الفيوم وكنت حضرت ندوة عملها اللج وكان بيديها م.ضياء في هندسة القهرة. واحنا إن شاء الله هنبدأ نشاط جديد . وهيكون مشترك بين كلية الهندسة وكلية الحاسبات والمعلومات. أول حاجة هنعملها هتكون يوم الأربعاء 8/10/2008 وهتكون ندوة عن البرمجيات الحرة وهنعلن خلالها عن بداية نشاطنا. في نهاية الندوة عايزين نعلن عن ورشة عمل أو كورس يوم واحد ااتعريف باللينكس وكيفية تثبيته على الجهاز .أنا خبرتي مش جامدة قوي باللينكس بس بعرف أنزله واشتغل عليه نص نص كده. وفي نفس الوقت مقتنع جدا بموضوع المصادر المفتوحة وكده. أنا بقترح عليكم انكم تيجوا تعملوا اللي انتوا عايزينه وتدوا الكورس الصغير ده. واحنا ممكن نجهزلكم المعامل واللي انتوا عايزينه. وع العموم الفيوم مش بعيدة عن القاهرة والجيزة. يعني اللي ساكن في الهرم ممكن يبقى في الفيوم في خلال ساعة بالكتير قوي , يعني قبل ما يوصل مدينة نصر ساعة في وقت الذروة. وده ممكن يبقى باب جديد للتعاون والانضمام لنشاطكم خاصة ان الفيوم قريبة من القاهرة. يعني أنا من الفيوم لحد ساقية الصاوي بخدها في ساعة ونص بالكتير. ده غير ان طلبة كتير من الفيوم بيتدربوا في القاهرة في الصيف. أنا مستني رأيكم وردكم قريب. وشكرا م. محمد حمودة
بداية البداية
أنا لا أعرف ما حجم النشاط الحقيقي لمجموعتكم ، ولكن ليكن في معلومكم أنني ذهب أكثر من 10 مرات لمكتبة الإسكندرية باحث عن أي اهتمام من قبل المكتبة بالمصادر الحرة ولم يخبرني أحدهم تماما عن الندوات الخاصة التي تقومون بها عن المصادر الحرة أو اللينكس ولم يذكر نهائيا أي شيء ، وهذا دفعني لمحاولة الوصول لقسم ال IT في المكتبة محاولة مني لعرض فكرة انه لابد وان ترعى المكتبة اي شيء حول المصادر الحرة ، وحتى في قسم الكمبيوتر في المكتبة لم يكن لهم أدنى فكرة وبالصدفة أرسل لي أحدهم عنوان موقعكم على سبيل انكم تهتمون والموقع مخصص عن اللينكس والمصادر الحرة واكتشفت انا بمجرد دخولي للموقع أن هناك ندوات ولقاءات تتم في المكتبة ، وهذا كان آخر ما اتوقعه .
اهتمامنا بالمصادر الحرة ومحاولة نشر هذه الثقافة اعتقدأن البداية وامثل بداية هي من خلال مكتبة الإسكندرية فإن كانت كما ندعي منارة علم وبؤرة حضارة ، فهي الأولى لأن تأخذ جل اهتمامنا في الفترة الحالية ومن نستطيع ان ننطلق بعدها لحدود أبعد .
أنا أنتظر لقاءكم في الندوة المقبلة في المكتبة وسأقوم بعدها بعمل قليل من الدعاية من خلال موقعي وأصدقائي المهتمين ، وهكذا تكون البداية ، أما ان نقوم بعمل جلسات في الجامعات والمدارس فهذا في اعتقادي امر مبكر جدا ، فهناك من لا يفهم كيف يكون الكمبيوتر واستخدامه ، علينا أن نبدأ بمن قد يأتي لأنه مهتم ويريد أن يعرف ، ومن ثم يقوم هو بدوره بنشر المعلومة او جذب المزيد من المهتمين .
شكرا جزيلا على هذا الموقع وهذا الاهتمام
عاوزين نعمل
عاوزين نعمل دعاية لـ جنو/لينوكس و المصادر المفتوحة/الحرة في الجامعات و المعاهد و حتى المدارس - غالبا هتكون مدارس ثانوي "لغات او خاصة -"
وليه يعني مدارس خاصة او لغات؟ هما اللى في مدارس حكومة مش من حقهم يتعلموا؟
+1
+1
السلام
السلام عليكم
أنا أيضا كان عندى فكرة لإقامة حملة لاستخدام اللينكس وبرامج المصدر المفتوح، واستهداف طلبة كليات الهندسة والحاسبات والمعلومات كبداية للحملة. واعتمدت على مجهودى الشخصى (المحدوووود جدا) بتوزيع نسخ كاملة وتجريبية من لينكس مع دعوة توضح الغرض من استخدام المصدر المفتوح ووسيلة اتصال للدعم الفنى. وبدأت بتوزيع عدد محدود من النسخ من خلال إحدى المكتبات المجاورة لمقر الكلية التى تخرجت منها. لكن للأسف أشعر بالإحباط لإنى لم أستطع نشر الفكرة كما ينبغى، ولو يصلنى أى استفسار ممن تلقوا النسخ، ولاحظت أن معظم الطلبة مهمومين بامتحانات الميد ترم وتصوير الملازم. أرجو أنى أستطيع المشاركة فى حملة جادة لنشر استخدام المصدر المفتوح فى الجامعات والهيئات الحكومية.
هذه نسخة من الدعوة،و يسعدنى تلقى اقتراحات أو معونات لنشر الحملة. (فيد الله مع الجماعة).
أنت مدعو لتجربة أحدث أنظمة اللينكس، openSuse 11.0، وهو نظام تشغيل آمن، بكفاءة عالية، مفتوح المصدر open source، ويتمتع بسهولة الاستخدام. متاح مجانا على الإنترنت. (ملحوظة: توزع نسخ كاملة dvd، أو نسخ تجريبية live cd من openSuseمع هذه الدعوة، ويمكنك استخدامها مع نظام ويندوز).
ما هى البرامج المقتوحة المصدر:
هى أى نوع من البرامج (أو أنظمة التشغيل) مصدرها مفتوح للجميع، ليتمكن مطورى البرامج والمهندسين من تطويرها وإصدار نسخ أفضل. وفى هذا ميزة، حيث يشارك عدد غير محدود من الخبراء فى تطوير البرنامج، وكثيرا ما تنافس البرامج الخاصة بالشركات وتتفوق عليها رغم قلة أسعارها. (معظم برامج المصدر المفتوح متاحة مجانا للمستخدم، وفى حالات نادرة تكون بعض النسخ المطورة من البرنامج بفلوس).
وما الفائدة من استخدام برامج المصدر المفتوح:
أولا:- نحن كعرب، مسلمين ومسيحيين، لا يصح لنا أن نعتمد على نسخ (مضروبة أو مسروقة) من البرامج التجارية، مثل نظام الويندوز وبعض برامج الـ Anti-viruses والبرامج المكتبية Microsoft office والكثير جدا منا يعتمد على نسخ هذه البرامج دون شراء! ونحن كأصحاب حق، يجب أن نحترم القوانين وإن لم يكن هناك رادع، ونسعى لاحترام الآخرين لنا. قال تعالى: (ولا تبخسوا الناس أشياءهم ) – سورة هود 85 (لا تخونوا الله ورسوله وتخونوا أماناتكم وأنتم تعلمون ) – سورة الأنفال 27
ثانيا:- معظم برامج المصدر المفتوح جودتها أعلى، ومجال مساعدة مستخدميها أكبر، وذلك من خلال المنتديات والـ Documentation
ثالثا:- بالنسبة لأنظمة التشغيل (مثل الـ openSuse)، لها مجموعة متنوعة من البرامج الخاصة بالـ Hardware مثلا يمكن التعرف على الـ Bluetooth والـ WiFi على أجهزة اللابتوب بمجرد تثبيت نظام التشغيل، دون الحاجة لإنزال برامج إضافية
هل توجد معوقات لاستخدام برامج المصدر المفتوح:
- عدم شهرتها مقارنة بالبرامج التجارية، وبالتالى تقل معرفة المستخدمين بإمكانياتها وكيفية الاستخدام. (ولكن غالبا ما تكون هناك Technical support على شبكة الإنترنت لمساعدة المستخدمين)
- بالنسبة لأنظمة التشغيل (مثل اللينكس) لا تستطيع تشغيل بعض البرامج والألعاب التى تعمل على نظام ويندوز والعكس صحيح. (والحقيقة أن بعض البرامج يمكن أن تعمل على النظامين مثل مجموعة الـ openOffice, كما توجد برامج والألعاب خاصة لأنظمة لينكس ويمكن تحميلها من شبكة الأنترنت).
للاستفسار أو الدعم الفنى: eg.kbase@gmail.com
فكرة جميلة ...لكن
السلام عليكم مع إحترامى لراى ضراتكم فى توزيع نسخ مجانية او سى دى لايف الناس مش عايزين حلجة مجانية يقدر ماهم عايزين حد يفهمهم أهمية الحاجة دى وإستخدامها إزاى وبعدين إذا اقتنعوا بيها ...صدقنى هما هايدوروا عليه بنفسهم
وعلشان كده أرجوا انكم تهتموا أكتر باللى هايوصل الفكرة مش بالفكرة
ياريت فى أسيوط كمان......
السلام عليكم والله فكرة هايلة انالسه بادئة فى اللينكس جديد وانا من أسيوط ونفسى أنفذ الفكرة دى فى أسيوط بس الحقيقةمن واقع تجربتى ما عايزة أقولكم ان اى حد هايبدأ يشتغل على النظام ممكن اوى يحبه لكن ممكن يزهق لو مالقيش حد يساعده والذات لو فبلد زى بلدنا دى ،يمكن اللى بيستخدموا اللينكس مايطلعوش 5 أو 6 بس فعلا مشجعة الفكرة ونفسى حد يتواصل معاى ويساعدنى
أرجوا التواصل للمساعدة
ياريت حد يتواصل معايا ويقولى ممكن اعمل ايه علشان ننشر فكرة البرامج المفتوحة فى بلدنا وممكن كمان نعود الأطفال من صغرهم يستخدموا اللينكس بدل من الويندوز لأنه مجانى وحلال وبينمى التفكير(من شب على شئ، شاب عليه) إن شاء الله الفكرة تنجح وربنا يكرمنا قال رسول الله صلى الله عليه وسلم (خير الناس أنفعهم للناس)
maosa_2010@yahoo.com