في ناس لازم نشكرها ﻷنها عامل أساسي في النجاح ده، مش حأذكر أسماء وسامحوني لو نسيت حد أو كيان:
- القادمون الجدد: المتطوعين الجداد اللي ساهموا لأول مرة في أنشطة المجموعة وكان في منهم بيسافروا كل يوم عشان يساعدوا، الناس دي أضافت قيمة جديدة للمجموعة
- الأعضاء القدامى المساهمين: خبرتهم فرقت كتير، في ناس كان فعلا وقتها مايسمحش ولكن ساهموا في التنظيم وأثناء المهرجان مساهمة أعطت للمهرجان الطعم المعتاد
- مجموعة اسكندرية: كانوا منتشرين في كل حتة وكونوا نواة سريعة لنشاطات جديدة في اسكنرية حانشوف ثمرتها قريب ان شاء الله
- اصحاب المبادرة: الناس اللي ساهمت في جعل هذا الحدث حقيقي بدلا من مجرد اقتراح في فترة قصيرة
- مسرح روابط: ودول أكيد طبعا مش "آخرا" نشكرهم على كل الدعم اللي قدموه والتعاون الحالي والمستقبلي مع المجموعة
- الشركات المساهمة: فبالرغم من ان المهرجان كان مخطط يكون بالمجهودات الذاتية، ولكن ساعد وجود تلك الشركات على لفت الأنظار الى جدوى البرمجيات المفتوحة كمصدر اقتصادي وتوفير فرص عمل
ممكن أكون نسيت فياريت تفكروني، وعشان مايكونش المقال ده من غير فايدة مضافة فأنا ححاول أجمع هنا نقاط الشكوى من المهرجان وأناقشها من وجهة نظري ونحسنها ازاي:
- الشكوى العامة كانت في التنظيم ودي طبعا في الاعتبار لكن مشكلتها الرئيسية كانت في عدم الالتزام من بعض المتطوعين، يعني مثلا الناس اللي كتبت اسمها في الويكي "ونسيت" تيجي في اجتماعات التنظيم أو أثناء المهرجان دي ناس عظيمة وعلمتنا دروس ممتازة في الالتزام
- برضه تنظيم الجلسات وأنا أعترف ان لحد قبل بداية المهرجان بـ5 دقائق كان فيه جلسات مش متحضرة وده برضه راجع للسبب في النقطة السابقة "الالتزام"، أود لفت النظر أن الناس بتكون متطوعة مش مدفوعة الأجر فالموضوع بيكون كله نابع من الحافز الذاتي والاحترام
- مكان الاحتفال: المهرجان كان بالجهود الذاتية ولم تتوفر الفرص والموارد للحصول على مكان أفضل، شخصيا ليس لدي اعتراض على المكان طالما أدى مشكورا الغرض، وللعلم الساقية كانت في البداية برضه كده ماكانتش الحاجة اللي موجودة دلوقت
المهم اجمالا فيه ناس رائعة استفادت وانضمت وده واضح في الموقع.
معلش طولت عليكو
