استخدام اوداسيتي في تسجيل و تحرير الملفات الصوتية

علشان نفهم قدرات اوداسيتي بسهولة، هنستخدم مثال واقعي.

السيناريو:

حضرتك بتعزف جيتار و معاك ميكروفون و عايز تسجل اغنية، انت معندكش ميكسر او مش عايز تغني و انت بتعزف في نفس الوقت، أو عايز تسجل بنضافة (كل آلة في تراك) لأنك هتسخدم مؤثرات معينة على الجيتار و مؤثرات تانية علي صوتك، أو أي سبب تاني...

البداية: هنفترض إن الصوت شغال عندك تمام (داخل و خارج)، تقوم فاتح اوداسيتي، طبعاً الأسهل انك تسجل تراك الجيتار الأول. هتدوس Record وتعزف براحتك وفي الآخر Stop. طب عايزين نسجل الصوت (الVocals يعني) ، بس في نفس الوقت تسمع تراك الجيتار- اللي انت لسة مسجله - على الهيدفون (طبعاً مش السماعات العادية علشان المايك ميسجلوش تاني) ، تقوم فاتح File - Prefrences - Audio I/O و تختار Play other tracks while recording new one. و تسجل صوتك براحتك.

الشغل: دلوقتي تسمع التراكين مع بعض. اعتقد أول حاجة هتلاحظها ان تراك الكلمات متأخر عن الجيتار شوية، دي مشكلة تقنية سببها الLatency و حلها سهل جداً و هو انك تحاول تقص من اول تراك الVocals بما يعادل زمن التأخير. تاني مشكلة تقابلك هي في الأغلب الضوضاء الخلفية ، ممكن تستخدم Noise Removal في حلها، مع التحفظ ان تلك الطريقة نادراً ما تعطي النتيجة المرجوة و انصح باستخدام Mic Preamp من اﻷول احسن.